HAPPY KIDS төслийн санхүүжилтээр Чингэлтэй дүүргийн 57-р сургуулийн номын санг бүрэн тохижуулж хүлээлгэн өглөө. Номын сангийн нээлтийн ёслолд Чингэлтэй дүүргийн Боловсролын Хэлтсийн мэргэжилтэн Э.Ундрахбуян, 57-р сургуулийн захирал, багш ажилчид, сурагчид, эцэг эхийн төлөөллүүдээс гадна БНСУ-аас Чонбуг аймгийн Хандивын Хорооны төлөөлөгчид зорин ирж оролцсон юм. Хандивлагчид нээлтийн арга хэмжээний дараа дөрөв болон тавдугаар ангийн 90 гаруй сурагчдад илбийн үзүүлбэр үзүүлж, бүтээл хийх арга аргачлал зааж, хөгжөөнт тоглоом тоглуулан цагийг хөгжөөнтэй сайхан өнгөрүүллээ. Ийнхүү хүүхдүүдийн сурч хөгжих хүсэл эрмэлзлийг бадраасан, сургуулийн орчинг түшиглэсэн иж бүрэн нэг номын сан Нийслэлд шинээр мэндэллээ.