“Бага насны хүүхдийн эрүүл мэнд, хамгаалал” төслийг хэрэгжүүлж эхэллээ.
Гүүд Нэйборс ОУТББ-ын Монгол дахь төлөөлөгчийн газар бага насны хүүхдийн цогц хөгжлийг дэмжих арга хэмжээний хүрээнд НҮБ-ын Хүүхдийн Сангийн санаачилга, санхүүжилт, БШУЯ, ЭМЯ-ын дэмжлэгээр “Бага насны хүүхдийн эрүүл мэнд, хамгаалал” төслийг хэрэгжүүлж эхэллээ. Төслийг Нийслэлийн Баянзүрх дүүргийн ЗДТГ-тай хамтран 25 цэцэрлэгт хэрэгжүүлж байна.
“Бага насны хүүхдийн эрүүл мэнд, хамгаалал” төслийн нээлтийн ажиллагаа 4 сарын 18-нд БЗД-ийн ЗДТГ-ын Хуралдааны танхимд боллоо. Нээлтэд БШУЯ-ын СӨБ-ын хэлтсийн дарга Ж.Мягмар, НҮБ-ын Хүүхдийн Сангийн Монгол дахь Суурин төлөөлөгч Эваристе Коуасси-Комлан, Гүүд Нэйборс ОУТББ-ын Монгол дахь төлөөлөгчийн газрын Суурин төлөөлөгч Жү Сүн Хён, ЭМЯ-ны НЭМГ-ын амны хөндийн эрүүл мэндийн асуудал хариуцсан мэргэжилтэн Б.Дөлгөөн, БЗД-ийн Боловсролын хэлтсийн дарга Б.Ганбат болон 25 цэцэрлэгийн эрхлэгч оролцсон юм.
Төслийн хүрээнд СӨБ-ын багш нар хүүхдийн эрх, хамгааллын суурь ойлголт, амны хөндийн эрүүл мэндийн дадал хэвшлийг олон хувилбарт хэрэглэгдэхүүний тусламжтай, оролцоонд суурилсан идэвхтэй сургалтын аргаар бага насны хүүхдэд хүргэх агуулга, арга зүй эзэмшинэ.